25 апрельдә эшмәкәр Фәнир Галимов инициативасы белән Туймазы шәһәрендә урнашкан “Төмәнәк” татар иҗтимагый тарихи-мәдәни үзәгендә халкыбызның бөек шагыйре Габдулла Тукайга бюст ачу тантанасы узды. Чарада Туймазы хакимияте вәкилләре, Туймазы татар дәүләт драма театры артистлары, районның “Алтын башак” иҗат берләшмәсе, ветераннар советы, Татарстанның Актаныш, Башкортстанның Бакалы, Шаран, Дүрөйле районнарыннан килгән мәртәбәле кунаклар, китапханәчеләр һәм мәктәп укучылары катнашты. Бюстның авторы – Октябрьский шәһәрендә яшәп иҗат итүче скульптор Рамил Шафигуллин.
