2019 елның 4 гыйнварында Уфа шәһәренең М.Гафури исемендәге Башкорт академия драма театры сәхнәсендә “Без Гафурины укыйбыз – 2018” Халыкара нәфис сүз конкурсының финалы үтте. Конкурс “М.Гафури – ХХI гасыр” мәдәният фонды” Региональ иҗтимагый оешмасы тарафыннан уздырылды. Финалда Башкортстанның Туймазы, Сибай, Октябрьский, Күмертау шәһәрләреннән, Краснокама, Гафури, Күгәрчен, Миякә, Ярмәкәй районнарыннан, шулай ук Чувашстаннан, Македония, Эстония, Белоруссия, Болгария һәм Чехия илләреннән 100дән артык кеше катнашты.

25 декабрь көнне Татарстан Республикасының Башкортстан Республикасындагы Даими вәкиле Ранэль Рубиль улы Зинәтуллин Башкортстандагы татар иҗтимагый оешмалары җитәкчеләре, аның актив әгъзалары белән эшлекле очрашу үткәрде. Анда үткән елда уздырылган эшләргә йомгак ясалды, киләсе елга бу нисбәттән перспективалы юнәлешләр барланды, аларны тормышка ашыру мәсьәләләре, оешмаларны борчыган проблемалар турында ачыктан-ачык сөйләшенде.

Шимбә көнне Уфа районының Козарез авылында татар халкының традицион бәйрәмнәреннән берсе булган “Каз өмәсе” булып узды. Аны оештыруда Башкортстан Республикасының “Ак калфак” татар хатын-кызлары ассоциациясенең Дим районы бүлеге зур активлык күрсәтте. Бу көнне бүлекнең рәисе Рәмилә ханым, аның тормыш иптәше Финат әфәнделәрнең йорты өмәчеләр, кунаклар, балалар авазыннан гөрләп торды.“Каз өмәсе” йоласының бөтен күренешләреннән дә “авыз итеп”, халкыбызның бәйрәмнәр үткәрүдәге маһирлыгына, талантына сокланмаган кеше калмагандыр!

18 декабрь көнне Уфа шәһәренең 159нчы мәктәбе бинасында “Башкортстанның башкала ел укытучысы – 2019” шәһәр конкурсының соңгы этабы узды. Конкурс кысасында “Укытуда яңа трендлар“ дип исемләнгән түгәрәк өстәл оештырылды. Башка предмет укытучылары белән беррәттән абруйлы комиссия алдында 65нче татар гимназиясеннән Заһитова Гүзәл Миртимер кызы һәм 84нче татар гимназиясеннән Идрисова Эльвира Мәлихан кызы да сынау тотты.